Costa Rica // La Pura Vida
18. - 30. August 2016
Costa Rica het für uns nume wenigi Stopps ka, do Nicaragua anschinend sehr ähnlich, aber viel günstiger isch. Mir sind bis uf 1 Tag
mitem Dani und dr Jule unterwägs gsi und händs gmeinsame Reise sehr gnosse!
Bahia Drake
Parque Nacional Corcovado
Uvita
In Uvita hämmer e super tolls Dschungel-Hüüsli im Flutterby Hostel. Wenns nit rägnet, miete mir uns Surfbrätter und wooge uns ind Wälle. Mir mache au e Usflug zume Wasserfall und nutze die tolli
Gmeinschaftschuchi: Gmües-Curry mit Riis, Burritos, Bruschettas und Knobli-Brot oder Spaghetti mit Tomatesauce und Gmües. Au s gsellige Zämäsii bim es paar Bierli und es paar Gläsli Cuba Libre chunnt
nit z churz!
La Fortuna // Volcán Arenal
Zum Zmorge gits - typisch für vieli zentralamerikanischi Länder - "Gallo Pinto": Riis mit rote oder schwarze Bohne, gwürzt mit ere typische Sauce und Koriander, drzue gits Rüehrei. Uns
schmeckts!
Mir händ uns für ei Tag e Auto gmietet, was günster gsi isch, wie wenn mr 4 Velos gmietet hätte!
Tabacon Grand Spa Thermal Resort
Unsere letzte Tag in Costa Rica isch es witters Highlight gsi. Vom Björn sinere Schwöster und ihrem Maa händ mir no vor unserer Abreis e Guetschiin für e Tagesitritt mit Znachtässe ime Luxus-Spa, em Tabacon, zum Geburtstag gschänkt kriegt. Es isch wirklich eifach nur traumhaft gsi, s Wätter het trotz dr Rägezyt super mitgspielt und bim Znacht-Buffet händ mir uns richtig d Büch voll gschlage! Nomol 1000 Dank, Jessi & Adrian, mir händs richtig gnosse!
Adios Costa Rica // Bienvenidos a Nicaragua
Tagwach: 5:00.
Mit zwei verschiedene Büs gohts and Grenze. Costa Rica het uns super gfalle und mir händ e super Zyt ka. S gilt vieli Ihdrück z verarbeite und am beste goht das mit ere Mütze voll Schloof im
Bus!
