H O N D U R A S

17. - 30. September 2016

In Honduras lönd mir für ei Mol s Festland komplett us - bzw. reise vo de Gränze direkt nach La Ceiba, em Fährhafe, und vo dört uf d "Islas de la Bahia" Utila & Roatan. Die Insle sind bekannt fürs Tauche, me cha dört sogar Walhaie gseh! Do mir jo beidi dr Advanced scho händ, stoht jetzt dr Rescue Diver ufem Programm. 

Utila

Scuba-Diving

... Und Plän sind do, damit me sie ändere cha. 
Uns hets in Utila so guet gfalle, dass mr uns entschiede händ, Roatan us z loh und drfür länger uf Utila z bliebe. Mir händ insgesamt 10 Scuba-Tauchgäng gmacht: 

Free-Diving

Usserdäm hämmer au beschlosse, dr Rescue-Diver nit z mache, drfür e Apnoe-Tauchkurs bi Freedive Utila.
D Nadja hets zerst überhaupt nit glustet, sie het sich denn aber überrede loh und isch super happy gsi! Scho nach em erste Tag im Wasser het sie Apnoe-Tauchschuele indr Schwyyz googlet. Uns hets beidne mega Spass gmacht und mir sind nach em dreitägige Kurs sogar nomol 3 Täg go Apnoe-Tauche! 
Zum Üebe sin mir jewiils 3 Stund im Wasser gsi. Me bereitet sich mit spezielle Atemtechnike ufe Tauchgang vor, drbi liegt me ufem Buuch im Wasser, hebt sich anere Boye und schnuuft dure Schnorchel.Denn zieht me sich ame Seil abe - entweder kopfsvorah, oder beivorah. 
Mir händ näbem Neoprenahzug au no Gwicht ume Buuch und spezielli, langi Flosse. 
D Nadja het uf Grund vo ihrer Seekranktheit  und nit wirkende Tablette au scho ihres Zmorge and Fisch gfüetteret und het vo dört ah die doppleti Dosis Seekrankheits-Tablette gno - 3 Stund anere Boye in de Wälle z ligge händs halt au in sich! 

Nach dene Übebigstauchgäng am Seil simmer meistens no füre halb Stund zume Riff gfahre und händ dört ohni Seil chli chönne umetauche (dört sind au d Fötteli entstande). 

Bim einte Usflug isch dr Tex, dr Bsitzer, durch e Tunnel in 37 Meter Tiefi taucht, während mir am Seil güebt händ. E Scuba-Taucher isch mit sinere Kamera drbi gsi und het e tolls Video vom ganze Tag zämägschnitte. (Bi 3'15 gseht me d Nadja am Seil abe tauche & Druckusgliich mache und me gseht d Walhaie, mit dene mir gschnorchlet sind). 

Björn's Bestleistig: 29 Meter!

Nadja's Bestleistig: 27 Meter!

Es isch e super tolle und lockeri Stimmig gsi in unserer Freedive-WG. Mir händ viel und guet kocht und ame sogar es gmeinsams Znacht gmacht.
Und es het sogar e Ofe ka: so hämmer flissig Brot und Zopf backt und Gratin & Pizza gmacht! 
Usserdäm isch e grosse Traum in Erfüllig gange: mir händ Walhaie gseh! 
Photo by: Shaun Doyle