NICARAGUA

30. August - 17. September 2016

E wittere Stempel in Pass, wieder 90 Täg Ufenthaltsbewilligung ohni das mr e Usreisebeleg oder e Beleg über gnüegend finanzielli Mittel hätte miesse vorzeige. Das Mol zelle wäg dr CA-4-Grenzkontrollenvereinbarung lediglich die 90 Täg grad für 4 Länder: Nicaragua, Honduras, El Salvador & Guatemala.

San Juan del Sur // Playa Madera, Playa Marsella, Playa Hermosa

Lang hämmer nach some XXL-Strandtuech gsuecht und endli hämmer eins gfunde!

Unseri wichtigsti Investition:

Unseri Tupper-Box und die chlini portabli Chuchi:

• Salz, Pfeffer und Chilli

• Öl und Baslamico

• Haferflöckli und Zimt

• Gable, Löffel, e scharfs Schnidmässer, e Gmüesrüster & 2 Bächer.

So chönne mir uns au in Hostels/Hotels ohni Chuchi e Salat, Avocado-Brötli oder Haferflöckli mit Frücht (ufem Bild mit Mango und Maracuja) zuebereite - Geld spare mr so zwar nit wirkli - do Frücht und Gmües relativ tüür sind - aber es isch e Alternative zu Riis und Bohne!

Usserdem bereite mir oft s Ässe vor und nämes denn mit uf längeri Busfahrte oder an Strand: Frücht, Gmües-Mix und Tortillas, Sandwich oder Bruschetta und Brot.

Und gege s Heimweh gits e chli Schwyzer Fernseh!

Isla de Ometepe

Es kanadisch-französischs Päärli het uns die Unterkunf empfohle: Puestra del Sol isch e Kommune, wo us 17 Familiene bestoht. Me cha dört bi Gastfamilieneübernachte, Z'Morge, Z'Mittag und Z'Nacht ässe und au hälfe, wenn me will. So isch d Nadja zu ihrem nicaraguanische Kochkurs cho und cha jetzt Gallo Pinto und Maistortillas zuebereite! Usserdäm händ unseri Gunmistiefel, wo mr sit Kolumbie mitgschleppt händ und es paar anderi Kleidigsstück neui Bsitzer gfunde. D Kommune biete au Toure a, vermiete Kayaks und Velos kriegt me sogar gratis.

Mit ere spanische Medizinstudäntin, wo aber in Buenos Aires läbt, händ mir e ganze Tag verbrocht, sind mit de Velos ume gradlet, zume Strand gange und hend s Charco Verde, es Natuschutzgebiet mit eme Papillorama bsuecht. S beste dra: gratis Spanischunterricht!

Volcán Conception

Usserdem simmer ufe aktive Vulkan ufe gwanderet. Wäg de viele Wolke het me Obe am Kraterrand aber weder in Vulkan ihne, no irgendöpis vo dr Ussicht gseh. Glohnt het sichs trotzdem!

Start: 100 Meter über Meer

Kraterrand: 1'610 Meter über Meer

Länge: 14 KM

Dauer: 9.5 Stund

Granada

Unseri Reisetäg bruche oft viel Nerve. Bi jedere Bus und Taxifahrt versueche die Ihheimische, de Touriste s Gäld us de Täsche z zieh. Um nit die ganz Zyt abzockt z werde, brucht me e gueti Portion Geduld und Spanisch-Kentniss, damit me cha handle. Mir händ zwar nit ufgschriebe, wie viel Geld mr so durch s abehandle gspaar händ, aber es isch einiges.

Es isch halt ganz e anderi Kultur, chum isch me mit eme grosse Rucksack unterwägs, wird me an jedem Egge agsproche: Taxi! Taxi! Collectivo a la Frontera! A San Juan! A Granada! Bus, muy barrato! Vamos Chicos!

Me chönnt meine, an das heige mr uns gwöhnt - aber s cha eim trotzdem no z viel werde.

Drzue chunnt nämli no, dass me sich uf kei Ussag cha verloh. Oft froge mr 3 verschiedeni Lüt machem Wäg, nach Priese, nach Abfahrtszyte etc. und erhalte drei verschiedeni Antworte. Und wahrschinli stimme alli drei nit.

So fest mir uns ame in däm Moment au nerve, umso meh lache mr nochhär drüber - vorallem bi dr Vorstellig vom Bahnhof SBB z Basel, wo alles Kontrolleure umestönd und schreie: Bern! Bern! Bern! Zürich!! Zürich! Liestal!

Masaya // Laguna de Apoyo // Volcán Masaya

Mir händ vo Granada us no e Tagesusflug zum Dörfli Catarina gmacht, wo me tolle Blick über d Lagune het. Usserdem simmer zum Vulkan Masaya, wo me immer flüssigi Lava cha bestuune. Füre Wäg vo Granada nach Masaya simmer mit eme sogenannte "Chicken Bus" gfahre. Das sind alti US-Schuelbüs, meistens farbig agmoolt und mit Jesus-Sprüch dekoriert, wo die Lokale und ebe oft au ihri Hienlibenutze. S isch ali nit ussergwöhnlich, wennd Frau näbe uns no e tots Güggeli ime Plastiksack drbi het!

Für die knapp 18km Wäg hämmer fast 2 Stund brucht. Do mr denn sowieso mit emT axi ufe zum Vulkan sind, hämmer uns dä Luxus gönnt und sind grad no mit em Taxi am Märt go ihkaufe und denn zrugg uf Granada.

Leon

In Leon hämmer e kurze Zwüschehalt gmacht, Kleider wäsche loh, kaputti T-Shirt nähie loh, Vorröt füre Ufenthalt in Las Peñitas ihkauft und am Obe mol wieder e Film gluegt: Forest Gump - e absoluteKlassikerund dr Nadja ihre Lieblingnsfilm.

Drnoch hämmer nicaraguanische Flor de Caña (Rum) trunke und mit zwei Basler pläuderlet.

Apropos Alkohol: Es isch wie es Ritual worde für uns, in jedem Land s lokale Bier z probiere!

Las Peñitas

In Las Peñitas hämmer es wunderschöns Bed & Breakfast gfunde, direkt am Strand. Eifach traumhaft!

Mir sind jo flissig unseri Bucket-List am abarbeite. Die Grotwanderig zwüsche dr richtige Mischig an Aktivitäte und Entspannig isch ame nit ganz eifach. Nach Kolumbie, Panama und Costa Rica simmer so am Afang in Nicaragua s erst mol e bitz reisemüed gsi - oder eher "strandmüed". Darum hämmer die Wuche uf dr Isla de Ometepe und in Granada sehr gnosse & freue uns jetzt nomol ufe Strand.

Esteli

S Kino in Estelí existiert nüm und d Tour ine Zigarrefabrik chönne mr wäg em Nationalfyyrtig "Dia de la Independencia" au nit mache. Also bliebe mr nume ei Nacht und s goht witter nach Somoto.

Übrigens: do isch s Poulet wenigstens gchüelt (wenn au nit zuedeckt) - uf de Märt liegts oft eifach offe und ungchüelt dört..

Somoto

Chum in Somoto acho - mir händ noni mol unsers Gepäck vom Dach vom Chicken Bus abe becho- quatscht uns e Tourguide a. Er verzellt uns vome Schwyzer, bi däm chönnte mr gratis wohne, wenn mr am negsteTagmit ihm e Tour in Canyon mache. Mir froge uns scho, wo do dr Hogge isch, aber händ dänkt, mir luege uns das mol a. Falls es nüt isch, würde mr zunere Gastfamilie go übernachte.

Dä Schwyyzer isch denn e 24 Jöhrige Genfer gsi, wo für drei Mönet do isch, zum sini Bachelorarbeit schriebe. Es goht drum, dass 24 Wasserreservoirs für Buure baut worde sind (finanziert durch e schwyzer Organisation), vo dene funktioniere aber nume 6. Er muess jetzt usefinde, worum die nit funktioniere und was me cha ändere/verbessere.

S isch sehr interessant und so sind mir au am erste Tag grad no mit ihm mit uf d Felder und händ alles alguet und erklärt kriegt!

Ah und do er oft elei isch, het er sich mit em Marco, unserem Tourguide zämä do. Dä bringt ihm denn Touriste, wo gratis chönne übernachte und wo denn bi ihm d Tour bueche - E dreifachi Win-Win-Situation!

Uns hets super gfalle, mir händs sehr lustig ka und mir sind grad drei Nächt bliebe!